انا المصلوب علي بابك بدون داعي....
ومنتيش حتي مهتمية بوداعي....
وشمسك غاوية تحرق في سمار جلدي....
بدون ماعرف مين الخاين في أتباعي!!!!!
###############################
يهوذا اللي اصطفيته ما بين حواريا....
طعن فيا..
وسلمني لشيخ مشكوك في اسلامه....
بكيت والدم غرق كل شئ فيا....
عشان صاحبي اللي بدّلني بإعدامه....
################################
منيش فاكر عنيكي خلاص....
ولا فاكر خطاويكي....
زرعت فأرضك الإخلاص....
حصدت الموت علي إديكي!!!!!
##################################
بقالي سنين بشد الطوق....
لحد الطوق ما جرّحني....
وضهري اللي انفرد مالشوق....
وجرح الطوق صبح محني!!!!!!
###################################
انا المصلوب و مشدود علي ضهر الصليب صاحي....
وكلي ذنوب موصلتشي لحد الكفر بعيونك....
انا المعجون..مابين صبري علي جراحي....
وبين عشقي اللي حالف عمره ما يخونك!!!!!!
####################################
وفي الأخر ..
خدوني الكهنة للفرعون وقالوا متهم بالسحر.....
حكولو حكاية التعبان..
وقالوا اني بشق البحر..
أمرهم بالصليب تاني..
وانا صابر عشان مغلوب..
أخدت الموت فأحضاني..
وعلشانك حلفت ماتوب!!!!!
###################################
يا خضرا ..والخضار مخطوف...
انا مش خضرك العارف...
دانا غلبان..وزيي ألوف...
انا محتار....انا خايف...
####################################
يا أم و أب فايتنّي...
يتيم وحزين في أراضيكي...
أنا مش رب صلبنّي...
و كل أملي اراضيكي!!!!
####################################
فأرجوكي عشان خاطر...
هوايا ميترميش عالأرض...
تعالي و اجبري الخاطر...
وراح تبقيلي سنة و فرض!!!!